കേരളത്തിന്റെ ചരിത്രത്തിൽ സുവർണ്ണ ലിപികളിൽ എഴുതപ്പെടേണ്ട ഒന്നാണ് 2025 ഒക്ടോബർ 9-ന് കേരള നിയമസഭ പാസ്സാക്കിയ “2025-ലെ മലയാളഭാഷാ ബിൽ’. 1969-ലെ കേരള ഔദ്യോഗികഭാഷാ നിയമം എന്നെന്നേക്കുമായി റദ്ദാക്കിക്കൊണ്ട്, പുതിയ കാലഘട്ടത്തിന്റെ വെല്ലുവിളികളെയും ആവശ്യങ്ങളെയും മുൻനിർത്തിയാണ് ഈ ബില്ല് രൂപകൽപ്പന ചെയ്തിരിക്കുന്നത്. ഇന്ത്യൻ ഭരണഘടനയുടെ ഫെഡറൽ സംവിധാനത്തിനുള്ളിൽ നിന്നുകൊണ്ട്, കേരളത്തിന്റെ ഏക ഔദ്യോഗിക ഭാഷയായി മലയാളത്തെ പൂർണാർത്ഥത്തിൽ പ്രതിഷ്ഠിക്കുക എന്നതാണ് ഈ നിയമത്തിന്റെ കാതലായ ലക്ഷ്യം. കേവലം ഒരു ഭാഷാമാറ്റത്തിനപ്പുറം, ഭരണകൂടം ജനങ്ങളോട് സംസാരിക്കേണ്ടത് ജനങ്ങളുടെ ഭാഷയിലായിരിക്കണം എന്ന ജനാധിപത്യപരമായ നിർബന്ധബുദ്ധിയാണ് ഈ ബില്ലിനു പിന്നിലുള്ളത്. ഭരണനിർവഹണം, നീതിന്യായ വ്യവസ്ഥ, വിദ്യാഭ്യാസം, വാണിജ്യം, വിവരസാങ്കേതികവിദ്യ തുടങ്ങി കേരളത്തിന്റെ സമസ്ത മേഖലകളിലും മലയാളത്തിന് അപ്രമാദിത്യം നൽകുന്നതോടൊപ്പം, ഭാഷാന്യൂനപക്ഷങ്ങളുടെ അവകാശങ്ങൾ സംരക്ഷിക്കാനും നിയമം ശ്രദ്ധിക്കുന്നുണ്ട്.
ഭരണനിർവഹണത്തിലെ സമ്പൂർണ മലയാളവൽക്കരണം
ഈ നിയമത്തിന്റെ ഏറ്റവും പ്രധാനപ്പെട്ട അധ്യായങ്ങൾ ഭരണനിർവഹണത്തെ സംബന്ധിക്കുന്നതാണ്. ജനാധിപത്യത്തിൽ പൗരൻ രാജാവാണെങ്കിൽ, രാജാവിന് മനസ്സിലാകുന്ന ഭാഷയിലായിരിക്കണം ഭരണകൂടം ഉത്തരവുകൾ പുറപ്പെടുവിക്കേണ്ടത്. ഈ തത്ത്വം മുൻനിർത്തി, നിയമസഭയിൽ അവതരിപ്പിക്കുന്ന ബില്ലുകൾ, പാസ്സാക്കുന്ന ആക്ടുകൾ, ഓർഡിനൻസുകൾ, ചട്ടങ്ങൾ, ബൈലോകൾ എന്നിവയെല്ലാം മലയാളത്തിലായിരിക്കണമെന്ന് ബില്ല് കർശനമായി നിഷ്കർഷിക്കുന്നു. നിലവിൽ ഇംഗ്ലീഷിലുള്ള പല നിയമങ്ങളും സാധാരണക്കാർക്ക് അപ്രാപ്യമാണ്. ഇതിനൊരു പരിഹാരമായി കേന്ദ്ര-–സംസ്ഥാന നിയമങ്ങൾ ഒരു നിശ്ചിത സമയത്തിനുള്ളിൽ മലയാളത്തിലേക്ക് വിവർത്തനം ചെയ്യാനും നിയമം നിർദ്ദേശിക്കുന്നു.
സർക്കാർ സെക്രട്ടറിയേറ്റ് മുതൽ വില്ലേജ് ഓഫീസുകൾ വരെയും, അർദ്ധസർക്കാർ സ്ഥാപനങ്ങൾ, പൊതുമേഖലാ സ്ഥാപനങ്ങൾ, സഹകരണ സ്ഥാപനങ്ങൾ, തദ്ദേശസ്വയംഭരണ സ്ഥാപനങ്ങൾ എന്നിവിടങ്ങളിലും എല്ലാ ഔദ്യോഗിക ആവശ്യങ്ങൾക്കും മലയാളം ഉപയോഗിക്കേണ്ടതാണ്. ഫയലുകൾ, ഉത്തരവുകൾ, സർക്കുലറുകൾ എന്നിവ മലയാളത്തിലാകുന്നതോടെ ഭരണസുതാര്യത വർദ്ധിക്കും. എന്നിരുന്നാലും, പ്രായോഗിക ബുദ്ധിമുട്ടുകൾ ഒഴിവാക്കാനായി കേന്ദ്രസർക്കാർ, ഇതര സംസ്ഥാനങ്ങൾ, ഹൈക്കോടതി, സുപ്രീം കോടതി എന്നിവയുമായുള്ള കത്തിടപാടുകൾക്ക് ഇംഗ്ലീഷ് ഉപയോഗിക്കാനുള്ള അനുമതി നിയമം നൽകുന്നുണ്ട്. ഭരണഭാഷാ മാറ്റം സുഗമമാക്കുന്നതിനായി മലയാളഭാഷാ വികസന വകുപ്പ് എന്ന പേരിൽ ഒരു പ്രത്യേക വകുപ്പും അതിനൊരു ഡയറക്ടറേറ്റും നിയമം വിഭാവനം ചെയ്യുന്നു.
വിദ്യാഭ്യാസരംഗത്തെ
പൊളിച്ചെഴുത്ത്
ഒരു ഭാഷയുടെ നിലനിൽപ്പ് സാധ്യമാകുന്നത് അടുത്ത തലമുറയിലേക്ക് കൈമാറുന്നതിലൂടെയാണ്. ഈ തിരിച്ചറിവോടെയാണ് വിദ്യാഭ്യാസ മേഖലയിൽ വിപ്ലവകരമായ മാറ്റങ്ങൾ 2025-ലെ ബിൽ നിർദ്ദേശിക്കുന്നത്. സംസ്ഥാനത്തെ സർക്കാർ സ്കൂളുകളിലും എയ്ഡഡ് സ്കൂളുകളിലും പത്താം ക്ലാസു വരെ മലയാളം നിർബന്ധിത ഒന്നാം ഭാഷയായിരിക്കും. മലയാളമല്ലാത്ത മറ്റ് ഭാഷകൾ മാതൃഭാഷയായുള്ള കുട്ടികൾക്ക് അവരുടെ ഭാഷയ്ക്കൊപ്പം മലയാളം പഠിക്കാനുള്ള അവസരവും നിയമം ഉറപ്പാക്കുന്നു. എന്നാൽ, ആഗോളവൽക്കരണത്തിന്റെ കാലത്ത് കേരളത്തിലേക്ക് വരുന്ന അന്യസംസ്ഥാന തൊഴിലാളികളുടെ മക്കൾക്കും, പ്രവാസി മലയാളികളുടെ കുട്ടികൾക്കും ഈ നിയമം ബുദ്ധിമുട്ടുണ്ടാക്കാതിരിക്കാൻ ശ്രദ്ധിച്ചിട്ടുണ്ട്. ഇതര സംസ്ഥാനങ്ങളിൽ നിന്നും വിദേശത്തു നിന്നും വരുന്ന വിദ്യാർത്ഥികൾക്ക് 9, 10 ക്ലാസുകളിലും ഹയർ സെക്കൻഡറി തലത്തിലും മലയാളം പരീക്ഷ എഴുതുന്നത് നിർബന്ധമല്ല എന്ന ഇളവ് നൽകിയിട്ടുണ്ട്.
നീതിന്യായ വ്യവസ്ഥയിലെ
ഭാഷാമാറ്റം
സാധാരണക്കാരന് കോടതി നടപടികൾ ഇപ്പോഴും ബാലികേറാമലയാണ്. അതിന് പ്രധാന കാരണം കോടതിഭാഷ ഇംഗ്ലീഷാണ് എന്നതാണ്. ഈ അവസ്ഥയ്ക്ക് മാറ്റം വരുത്താൻ ഈ ബില്ല് ലക്ഷ്യമിടുന്നു. ഹൈക്കോടതിയുടെ അനുമതിയോടെ ജില്ലാ കോടതി വരെയുള്ള കോടതികളിലെ നടപടികളും വിധിന്യായങ്ങളും ഘട്ടംഘട്ടമായി മലയാളത്തിലാക്കാൻ നടപടി സ്വീകരിക്കും. സിവിൽ, -ക്രിമിനൽ നടപടിക്രമങ്ങൾ മലയാളത്തിലാകുന്നതോടെ നീതിനിർവഹണം കൂടുതൽ ജനകീയമാകും. കോടതികൾക്കു പുറമെ, അർദ്ധ ജുഡീഷ്യൽ (Quasi-judicial) അധികാരമുള്ള ട്രൈബ്യൂണലുകൾ ഉൾപ്പെടെയുള്ള സ്ഥാപനങ്ങളുടെ ഉത്തരവുകളും മലയാളത്തിലായിരിക്കണം എന്ന് ബില്ല് കർശനമായി പറയുന്നു. അപ്പീൽ ആവശ്യങ്ങൾക്കായി വിധിന്യായങ്ങൾ ഇംഗ്ലീഷിലേക്ക് വിവർത്തനം ചെയ്തു നൽകാനുള്ള സംവിധാനവും വിഭാവനം ചെയ്യുന്നുണ്ട്.
പൊതു ഇടങ്ങളും
വിവരസാങ്കേതികവിദ്യയും
കേരളത്തിന്റെ തെരുവുകൾക്ക് മലയാളത്തിന്റെ മുഖം നൽകാൻ ബില്ല് വ്യവസ്ഥ ചെയ്യുന്നു. സർക്കാർ സ്ഥാപനങ്ങളുടെ ബോർഡുകൾ മലയാളത്തിലും ഇംഗ്ലീഷിലും ആയിരിക്കണം. സ്വകാര്യ കച്ചവട സ്ഥാപനങ്ങൾ, ആശുപത്രികൾ, ഹോട്ടലുകൾ തുടങ്ങിയവയുടെ ബോർഡുകളിൽ ആദ്യ പകുതി മലയാളത്തിലും, വ്യക്തമായി കാണത്തക്ക രീതിയിലും ആയിരിക്കണം. കൂടാതെ, കേരളത്തിൽ വിൽക്കുന്ന ഉൽപ്പന്നങ്ങളുടെ ലേബലുകൾ, ഉപയോഗക്രമം എന്നിവ മലയാളത്തിൽ കൂടി രേഖപ്പെടുത്തണം എന്നത് ഉപഭോക്തൃ അവകാശങ്ങളുടെ കൂടി വിജയമാണ്.
ബോർഡുകൾക്ക് പുറമെ മാധ്യമങ്ങളിലെ പരസ്യങ്ങളിലും നിയമം ഇടപെടുന്നുണ്ട്. സർക്കാർ പരസ്യങ്ങൾ കേരളത്തിനുള്ളിൽ നൽകുമ്പോൾ അത് മലയാളത്തിൽ ആയിരിക്കണമെന്നും, പത്രങ്ങളിൽ നൽകുന്ന പരസ്യങ്ങളുടെ നിശ്ചിത ശതമാനം മലയാളത്തിലായിരിക്കണമെന്നും ബില്ല് നിഷ്കർഷിക്കുന്നു. മാത്രമല്ല ഡിജിറ്റൽ യുഗത്തിൽ ഭാഷയെ സജ്ജമാക്കാനും നിയമം മറന്നില്ല. സർക്കാർ വെബ്സൈറ്റുകളുടെ ഡിഫോൾട്ട് പേജ് (Default Page) മലയാളമായിരിക്കണം. ഇ -ഗവേണൻസ്, മൊബൈൽ ഗവേണൻസ് എന്നീ പദ്ധതികളുടെ അടിസ്ഥാന ഭാഷ മലയാളമായിരിക്കും. സ്വതന്ത്ര സോഫ്റ്റ്വെയറുകൾ വികസിപ്പിക്കാനും, കമ്പ്യൂട്ടിങ് മലയാളം പ്രോത്സാഹിപ്പിക്കാനും നിയമം ഊന്നൽ നൽകുന്നു.
ഭാഷാന്യൂനപക്ഷങ്ങളുടെ
അവകാശങ്ങൾ
2025-ലെ ബിൽ മലയാളത്തിന് പ്രാമുഖ്യം നൽകുമ്പോഴും, കേരളത്തിലെ തമിഴ്, കന്നഡ ഭാഷാന്യൂനപക്ഷങ്ങളുടെ അവകാശങ്ങൾക്ക് പ്രത്യേക സംരക്ഷണം ഉറപ്പാക്കുന്നുണ്ട്. പരമ്പരാഗതമായി തമിഴ്, കന്നഡ ഭാഷകൾ ഉപയോഗിക്കുന്നവരും ഭാഷാന്യൂനപക്ഷ പ്രദേശങ്ങളിൽ അധിവസിക്കുന്നവരുമായ ജനങ്ങളെയാണ് നിയമം ‘ഭാഷാന്യൂനപക്ഷം’ എന്ന് നിർവചിക്കുന്നത്. ഇവർക്ക് സർക്കാർ ഓഫീസുകളിലേക്കുള്ള കത്തിടപാടുകളിൽ സ്വന്തം ഭാഷ (തമിഴ്/കന്നഡ) ഉപയോഗിക്കാവുന്നതും, അതിനുള്ള മറുപടി അതേ ഭാഷയിൽ തന്നെ ലഭിക്കാൻ അവകാശമുള്ളതുമാണ്. ജനാധിപത്യപരമായ ഈ ബഹുസ്വരത കാത്തുസൂക്ഷിക്കാൻ ബില്ല് പ്രത്യേകം ശ്രദ്ധിക്കുന്നു.
തമിഴ്നാട്, കർണാടക ഭാഷാ
നിയമങ്ങളുമായുള്ള താരതമ്യം
2025-ലെ മലയാളഭാഷാ ബില്ലിന്റെ പ്രസക്തി പൂർണമായി മനസ്സിലാകണമെങ്കിൽ, നമ്മുടെ അയൽസംസ്ഥാനങ്ങളായ തമിഴ്നാടും കർണാടകവും സ്വീകരിച്ചിട്ടുള്ള ഭാഷാ നയങ്ങളുമായി ഇതിനെ താരതമ്യം ചെയ്യേണ്ടതുണ്ട്.
1. തമിഴ്നാട് മാതൃകയും
കേരള ബില്ലും
തമിഴ്നാട് 1956-ലെ ഔദ്യോഗിക ഭാഷാ നിയമമാണ് (Tamil Nadu Official Language Act, 1956) പിന്തുടരുന്നത്. തമിഴ്നാടും കേരളവും ഭാഷാസ്നേഹത്തിൽ മുന്നിലാണെങ്കിലും സമീപനത്തിൽ വലിയ വ്യത്യാസമുണ്ട്.
സമീപന രീതി: തമിഴ്നാട് പ്രധാനമായും “ഭാഷാ പ്രോത്സാഹനം’ (Promotion) എന്ന നയമാണ് സ്വീകരിക്കുന്നത്. ഭരണതലത്തിൽ തമിഴ് ഔദ്യോഗിക ഭാഷയാണെങ്കിലും, ഇംഗ്ലീഷ് ഉപയോഗത്തിന് അവിടെ ഇപ്പോഴും വലിയ പ്രാധാന്യമുണ്ട്. എന്നാൽ കേരളത്തിന്റെ 2025-ലെ ബിൽ ഇംഗ്ലീഷ് ഉപയോഗം പരമാവധി കുറച്ച്, എല്ലാ തലത്തിലും മലയാളം ഉറപ്പാക്കാനാണ് ശ്രമിക്കുന്നത്.
വിദ്യാഭ്യാസം: തമിഴ്നാട്ടിൽ 2006-ലെ നിയമപ്രകാരം തമിഴ് നിർബന്ധിത വിഷയമാണ്. എന്നാൽ കേരളത്തിൽ സർക്കാർ-, എയ്ഡഡ് മേഖലകളിൽ മലയാളം “നിർബന്ധിത ഒന്നാം ഭാഷ’ എന്ന നിലയിലേക്ക് ഉയർത്തപ്പെടുന്നു.
പൊതു ഇടങ്ങൾ: തമിഴ്നാട്ടിൽ ബോർഡുകളിലും മറ്റും തമിഴ് ഉപയോഗിക്കുന്നത് പ്രോത്സാഹിപ്പിക്കപ്പെടുന്നുണ്ടെങ്കിലും, കേരളത്തിലെ ബിൽ അത് നിയമപരമായി നിർബന്ധമാക്കുന്നു. സ്വകാര്യ സ്ഥാപനങ്ങളുടെ ബോർഡുകളിൽ പോലും മലയാളത്തിന് 50% സ്ഥലം നൽകണമെന്നത് കേരളത്തിന്റെ ശക്തമായ നിലപാടാണ്.
ഡിജിറ്റൽ മേഖല: കേരളത്തിന്റെ ബിൽ വിവരസാങ്കേതിക വിദ്യയിലും ഇ -ഗവേണൻസിലും മലയാളം ഉറപ്പാക്കുന്നതിൽ തമിഴ്നാട് നിയമത്തേക്കാൾ ബഹുദൂരം മുന്നിലാണ്.
ചുരുക്കത്തിൽ, തമിഴ്നാട് നിലവിലുള്ള സ്ഥിതി തുടരാനും (Status quo) ഭാഷയെ വൈകാരികമായി സമീപിക്കാനും ശ്രമിക്കുമ്പോൾ, കേരളം നിയമപരമായ ചട്ടക്കൂടിലൂടെ സമഗ്രമായ മാറ്റത്തിനാണ് ശ്രമിക്കുന്നത്.
2. കർണാടക മാതൃകയും
കേരള ബില്ലും
കർണാടകത്തിന്റെ ഭാഷാ നയം കേരളത്തിന്റേതിനോട് കൂടുതൽ അടുത്തുനിൽക്കുന്നതും, ചില കാര്യങ്ങളിൽ കേരളത്തേക്കാൾ കർക്കശവുമാണ്. 1963-ലെ നിയമത്തിന് പുറമെ, 2022-ലെ ‘കന്നഡ ഭാഷാ സമഗ്ര വികസന ആക്ട്’ (Kannada Language Comprehensive Development Act) വഴിയാണ് അവർ ഭാഷാ നയം നടപ്പാക്കുന്നത്.
സമാനതകൾ: ഭരണത്തിലും വിദ്യാഭ്യാസത്തിലും കോടതികളിലും തദ്ദേശീയ ഭാഷ നിർബന്ധമാക്കുക എന്നതിനെ ഇരു സംസ്ഥാനങ്ങളും ഒരേ രീതിയിലാണ് കാണുന്നത്.
വിദ്യാഭ്യാസം: കർണാടകത്തിൽ സി.ബി.എസ്.ഇ, ഐ.സി.എസ്.ഇ സ്കൂളുകളിൽ പോലും കന്നഡ നിർബന്ധമാക്കാൻ ശ്രമിച്ചത് വലിയ നിയമപോരാട്ടങ്ങൾക്ക് വഴിവെച്ചിരുന്നു. സർക്കാർ-എയ്ഡഡ് മേഖലയിൽ ശ്രദ്ധ കേന്ദ്രീകരിക്കുകയും, അന്യസംസ്ഥാന വിദ്യാർത്ഥികൾക്ക് വ്യക്തമായ ഇളവുകൾ നൽകുകയും ചെയ്യുന്നതിലൂടെ കൂടുതൽ പ്രായോഗികമായ സമീപനമാണ് കേരളം സ്വീകരിക്കുന്നത്.
ന്യൂനപക്ഷ സംരക്ഷണം: ഇവിടെയാണ് കേരള ബിൽ കർണാടക നിയമത്തിൽ നിന്നും വേറിട്ടുനിൽക്കുന്നത്. കർണാടകത്തിൽ അതിർത്തി പ്രദേശങ്ങളിൽ കന്നഡ അടിച്ചേൽപ്പിക്കുന്നതായുള്ള പരാതികൾ (ഉദാഹരണത്തിന് കാസർകോട് അതിർത്തിയിൽ) ശക്തമാണ്. എന്നാൽ കേരളത്തിന്റെ 2025-ലെ ബില്ലിൽ ഭാഷാ ന്യൂനപക്ഷങ്ങൾക്ക് (പ്രത്യേകിച്ച് തമിഴ്, കന്നഡ സംസാരിക്കുന്നവർക്ക്) ശക്തമായ സംരക്ഷണമുണ്ട്. അവർക്ക് സർക്കാർ ഓഫീസുകളിലേക്കുള്ള കത്തിടപാടുകൾ സ്വന്തം ഭാഷയിൽ നടത്താനും, മറുപടി അതേ ഭാഷയിൽ ലഭിക്കാനും അവകാശമുണ്ട്. “ഭാഷാ ന്യൂനപക്ഷം’ എന്നതിന് വ്യക്തമായ നിർവചനം നൽകി, അവരുടെ ജനാധിപത്യ അവകാശങ്ങൾ ഹനിക്കപ്പെടുന്നില്ല എന്ന് കേരള ബിൽ ഉറപ്പുവരുത്തുന്നു.
ശിക്ഷാ നടപടികൾ: കർണാടക നിയമത്തിൽ നിയമലംഘകർക്ക് പിഴയും ശിക്ഷയും കർശനമാണ്. കേരള ബില്ലിൽ ചട്ടങ്ങൾ രൂപീകരിക്കുമ്പോൾ മാത്രമേ ശിക്ഷാ നടപടികളെക്കുറിച്ച് വ്യക്തത വരികയുള്ളൂവെങ്കിലും, കർണാടകത്തെപ്പോലെ കടുത്ത ശിക്ഷാ രീതികൾ കേരളം അവലംബിക്കാൻ സാധ്യത കുറവാണ്.
ചുരുക്കത്തിൽ പ്രായോഗികവും എന്നാൽ ശക്തവുമായ ഒരു പാതയാണ് 2025-ലെ മലയാളഭാഷാ ബിൽ വെട്ടിത്തുറക്കുന്നത്. തമിഴ്നാടിനേക്കാൾ ആധുനികവും (ഡിജിറ്റൽ, ഐ.ടി വകുപ്പുകൾ), കർണാടകത്തേക്കാൾ ജനാധിപത്യപരവുമാണ് (ഭാഷാ ന്യൂനപക്ഷ സംരക്ഷണം) കേരളത്തിന്റെ പുതിയ ബില്ല്.
ഭാഷ എന്നത് കേവലം ആശയവിനിമയ ഉപാധിയല്ല, മറിച്ച് അതൊരു ജനതയുടെ സംസ്കാരത്തിന്റെയും നിലനിൽപ്പിന്റെയും ആധാരശിലയാണെന്ന തിരിച്ചറിവാണ് ഈ ബിൽ നൽകുന്നത്. ആധുനിക സാങ്കേതികവിദ്യയുടെയും ആഗോളവൽക്കരണത്തിന്റെയും കാലത്ത്, മലയാളം പിന്നാക്കം പോകാതിരിക്കാൻ ഈ നിയമം ഒരു കവചമായി വർത്തിക്കും. നിയമം പാസാക്കുന്നതിനേക്കാൾ പ്രധാനം അത് നടപ്പിലാക്കുന്നതിലാണ്. ഉദ്യോഗസ്ഥവൃന്ദത്തിന്റെ മനോഭാവവും പൊതുസമൂഹത്തിന്റെ സഹകരണവും, സാങ്കേതികവിദ്യയുടെ ഫലപ്രദമായ ഉപയോഗവും ഒത്തുചേർന്നാൽ മാത്രമേ ഈ നിയമം വിഭാവനം ചെയ്യുന്ന “മലയാളം ഭരണഭാഷയായ കേരളം’ എന്ന സ്വപ്നം യാഥാർത്ഥ്യമാകൂ. ഭാഷാ സ്നേഹികൾക്കും, സാംസ്കാരിക പ്രവർത്തകർക്കും സാധാരണ ജനങ്ങൾക്കും വലിയ പ്രതീക്ഷ നൽകുന്ന ഈ നിയമം, കേരള ചരിത്രത്തിലെ ഒരു വഴിത്തിരിവായി മാറും എന്നതിൽ തർക്കമില്ല. l
