സുസ്ഥിര ഭാവി ലാക്കാക്കിയുള്ള ബജറ്റ്

സംസ്ഥാനത്തിന്റെ സമഗ്രമായ വികസനം ലക്ഷ്യമാക്കിയുള്ള 2025 –26 ലെ ബജറ്റ് ധനമന്ത്രി കെ എൻ ബാലഗോപാൽ ജനങ്ങൾക്കായി സമർപ്പിച്ചു. ജനപക്ഷ നയങ്ങളുടെ പ്രാധാന്യം, സംസ്ഥാനത്തിന്റെ സുസ്ഥിരമായ വികസനം, കേരളത്തിന്റെ സമ്പദ്-വ്യവസ്ഥയുടെ പ്രതിരോധം എന്നിവയെ മുൻ നിർത്തിയാണ് ബജറ്റ് തയ്യാറാക്കിയിട്ടുള്ളത്.

കേന്ദ്ര സർക്കാർ നിർമ്മിതമായ സാമ്പത്തിക വെല്ലുവിളികൾ, കാലാവസ്ഥാ വ്യതിയാനംമൂലം അടിക്കടി നേരിടുന്ന പ്രകൃതി ദുരന്തങ്ങൾ എന്നിവയെല്ലാം അതിജീവിച്ചുകൊണ്ടാണ് നാടിന്റെ പുരോഗമനം ലക്ഷ്യമിടുന്ന ഈ ബജറ്റ് ജനങ്ങൾക്കുവേണ്ടി സമർപ്പിക്കുവാൻ സർക്കാരിനായത്.

നഗരവൽക്കരണം, കാലാവസ്ഥാ വ്യതിയാനം, ജനസംഖ്യാപരമായ വ്യതിയാനം തുടങ്ങിയ സങ്കീർണതകൾ സംസ്ഥാനം നേരിടുമ്പോൾ, ഈ ബജറ്റ് മുന്നോട്ടേയ്ക്കുള്ള വ്യക്തമായ പാത ചൂണ്ടിക്കാണിക്കുന്നു. സംസ്ഥാനം നേടുന്ന സമൃദ്ധിയിൽ എല്ലാവർക്കും പങ്കിടാനാവുന്നതും ആരും പിന്നിലാവില്ല എന്ന്- ഉറപ്പാക്കുന്നതുമാണ് ഈ ബജറ്റ്.

കേരളത്തിന്റെ സാമ്പത്തിക ആരോഗ്യം 
ശക്തിപ്പെടുന്നു
2025-–26 ലെ കേരള ബജറ്റിൽ ഏറ്റവും പ്രതീക്ഷ നൽകുന്ന വശങ്ങളിലൊന്ന് സംസ്ഥാനത്തിന്റെ സാമ്പത്തിക ആരോഗ്യത്തിൽ ഗണ്യമായ പുരോഗതി കൈവരിച്ചു എന്നതാണ്. 2021-–22 ലെ 2.25 ശതമാനത്തിൽ നിന്ന് 2023–-24 ൽ 1.58 ശതമാനമായി റവന്യൂ കമ്മി ഗണ്യമായി കുറയ്ക്കാൻ കേരളത്തിന് കഴിഞ്ഞു, ധനക്കമ്മി 4.04 ശതമാനമായിരുന്നത് 2.9 ശതമാനമായി കുറഞ്ഞു. മാത്രമല്ല, കഴിഞ്ഞ നാല് വർഷത്തിനിടെ സംസ്ഥാനം സ്വന്തം നികുതി വരുമാനം 70% വർദ്ധിപ്പിച്ച് 2024-–25 ൽ 81,000 കോടി രൂപയിലെത്തിക്കുവാനുമായി എന്ന സന്തോഷ വാർത്ത നൽകിയാണ് ബജറ്റ് അവതരണം തന്നെ ധനമന്ത്രി തുടങ്ങിയത്.

സാമ്പത്തിക സ്ഥിതി കൂടുതൽ മെച്ചപ്പെടുത്തുന്നതിനായി, അധിക വിഭവങ്ങൾ സമാഹരിക്കുകയെന്ന ലക്ഷ്യത്തോടെ ബജറ്റ് നിരവധി നൂതന നടപടികൾ അവതരിപ്പിക്കുന്നുണ്ട്. കോടതി ഫീസ് പരിഷ്കരിക്കുക വഴി , 150 കോടി രൂപ അധികവരുമാനമുണ്ടാകാമെന്നും, അതേസമയം ഭൂനികുതി ക്രമീകരണങ്ങൾ വഴി 100 കോടി രൂപ സമാഹരിക്കാമെന്നും കണക്കാക്കപ്പെടുന്നു.

വരുമാന അടിത്തറ വിപുലീകരിക്കുന്നതിനുള്ള ഗവൺമെന്റിന്റെ ക്രിയാത്മകമായ സമീപനത്തെയാണ് ഈ നടപടികൾ അടിവരയിടുന്നത്.

കൂടാതെ, ജിഎസ്ടി കുടിശ്ശികക്കാർക്ക് ഒരു പൊതുമാപ്പ് നൽകുന്ന പദ്ധതി നടപ്പാക്കുന്നത് ചെറുകിട വ്യാപാരികൾക്കും ബിസിനസുകാർക്കും ആശ്വാസം നൽകാനും അവരുടെ സാമ്പത്തിക ഭാരം ലഘൂകരിക്കാനും സഹായകമാകും.

അടിസ്ഥാന സൗകര്യ വികസനം:
കേരളത്തിന്റെ ഭാവിക്ക് അടിത്തറ പാകുന്നു
കേരളത്തിന്റെ ഗതാഗതം, നഗരവികസനം, ഡിജിറ്റൽ കണക്റ്റിവിറ്റി തുടങ്ങിയ മേഖലകളിൽ മാറ്റം വരുത്തുകയെന്ന ലക്ഷ്യത്തോടെ 2025-–26 ബജറ്റിൽ അടിസ്ഥാന സൗകര്യ വികസനമാണ് കേന്ദ്രസ്ഥാനത്തുള്ളത്.

കേരളത്തിന്റെ ഗതാഗത ശൃംഖലയുടെ തുടർച്ചയായ വിപുലീകരണം ഉറപ്പാക്കുന്ന റോഡ്, പാലം പദ്ധതികൾക്കായി മൊത്തം 3,061 കോടി രൂപ വകയിരത്തിയിട്ടുണ്ട്.

ആളുകളെയും സ്ഥലങ്ങളെയും കൂടുതൽ എളുപ്പത്തിൽ ബന്ധിപ്പിക്കുക എന്ന ലക്ഷ്യത്തോടെ കൊച്ചി, തിരുവനന്തപുരം, കോഴിക്കോട് എന്നിവിടങ്ങളിലെ മെട്രോ പദ്ധതികളുടെയും വിഴിഞ്ഞം തുറമുഖത്തിന്റെയും വികസനവും സംസ്ഥാനത്തിന്റെ അടിസ്ഥാന സൗകര്യങ്ങൾ നവീകരണവും ലക്ഷ്യമിട്ടുള്ളതാണ് ഈ വകയിരുത്തൽ.

നഗരവികസനത്തിനും ബജറ്റ് ഗണ്യമായ ശ്രദ്ധ നൽകിയിട്ടുണ്ട്, മാലിന്യ സംസ്കരണം, മലിനജല സംസ്കരണം, നഗര പരിവർത്തന പദ്ധതികൾ എന്നിവയ്ക്കായി 1,986 കോടി രൂപ നീക്കിവച്ചിട്ടുണ്ട്. ഉദാഹരണത്തിന്, കൊച്ചി-സുസ്ഥിര നഗര പുനർനിർമ്മാണ പദ്ധതി, നഗരങ്ങളെ സുസ്ഥിരവും പരിസ്ഥിതി സൗഹൃദപരവുമായ ഇടങ്ങളായി നവീകരിക്കുമെന്ന വാഗ്ദാനവും മുന്നോട്ടുവയ്ക്കുന്നു.

ഡിജിറ്റൽ അടിസ്ഥാന സൗകര്യ മേഖലയിൽ, കേരള ഫൈബർ ഒപ്റ്റിക് നെറ്റ്-വർക്ക് (കെ- ഫോൺ) മെച്ചപ്പെടുത്തുന്നതിന് 100 കോടി രൂപ ബജറ്റ് നീക്കിവച്ചിട്ടുണ്ട്; ഡിജിറ്റൽ യുഗത്തിൽ സംസ്ഥാനം മുൻപന്തിയിൽ ആകുമെന്ന ഉറപ്പ് മന്ത്രി ഈ ബജറ്റ് വഴി നൽകുന്നുണ്ട്.

ഊന്നൽ സാമൂഹികക്ഷേമത്തിന്
സാമൂഹ്യക്ഷേമത്തോടുള്ള അചഞ്ചലമായ പ്രതിബദ്ധതയാണ് കേരളത്തിന്റെ വികസന അജൻഡയുടെ കാതൽ. കഴിഞ്ഞ 42 മാസത്തിനിടെ സാമൂഹിക സുരക്ഷാ പെൻഷനുകളായി സംസ്ഥാനം 33,210 കോടി രൂപ വിതരണം ചെയ്തു, ഇത് പ്രായമായവർക്കും ദുർബലരായ ജനങ്ങൾക്കും സാമ്പത്തിക സ്ഥിരത നൽകുന്നു. സർക്കാർ ജീവനക്കാർക്കും പെൻഷൻകാർക്കും നൽകാനുള്ള ഡിഎ കുടിശ്ശിക കൊടുത്തു തീർക്കുമെന്നും ബജറ്റ് വ്യക്തമാക്കുന്നു. ഇത് തൊഴിലാളികളുടെ ജീവിതം മെച്ചപ്പെടുത്തുന്നതിനുള്ള സർക്കാരിന്റെ പ്രതിബദ്ധതയാണ് വെളിപ്പെടുത്തുന്നത്.

പാർപ്പിടം ഒരു മുൻഗണനയായി തന്നെ ഈ ബജറ്റിലും തുടരുന്നുണ്ട് , ലൈഫ് മിഷൻ പരിപാടി മികച്ച വിജയമായി നിലകൊള്ളുന്നു. 4.27 ലക്ഷം വീടുകളുടെ നിർമ്മാണം പൂർത്തിയായി; 1.11 ലക്ഷം വീടുകളുടെ കൂടി നിർമാണം പുരോഗമിക്കുകയാണ്. ഒരു ലക്ഷം അധിക വീടുകൾക്കു നിർമ്മിക്കുന്നതിനായി 1,160 കോടി രൂപ അനുവദിച്ചുകൊണ്ട്, പാർശ്വവൽക്കരിക്കപ്പെട്ടവർക്ക് താങ്ങാനാവുന്ന ഭവനങ്ങൾ നൽകുന്നതിൽ സർക്കാർ ഗണ്യമായ മുന്നേറ്റം നടത്തുന്നു.

കേരളത്തിന്റെ സാമൂഹികക്ഷേമ സംവിധാനത്തിന്റെ മൂലക്കല്ലായ ആരോഗ്യസംരക്ഷണത്തിന് 10,431 കോടി രൂപയാണ് നീക്കിവച്ചിട്ടുള്ളത്. 700 കോടി രൂപ കാരുണ്യ ആരോഗ്യ സുരക്ഷാ പദ്ധതിക്ക് (കെ എ എസ്- പി) പ്രത്യേകമായി അനുവദിക്കുന്നു. കഴിഞ്ഞ മൂന്നു വർഷത്തിനിടെ മാത്രം 25 ലക്ഷത്തിലധികം ആളുകൾക്ക് സൗജന്യ ചികിത്സ നൽകുന്നതിന് 6,788 കോടി രൂപ ചെലവഴിച്ച്- കേരളത്തിന്റെ സൗജന്യ ആരോഗ്യ പരിരക്ഷ മാതൃകപരമായി തുടരുന്നു.

സാമ്പത്തിക വളർച്ചയും 
വ്യാവസായിക നവീകരണവും
സാമ്പത്തിക വളർച്ചയുടെ കേന്ദ്രമായി കേരളം സ്വയം മുന്നേറുകയാണ്; അഭിവൃദ്ധിപ്രാപിച്ചും നൂതനമായ സമ്പദ്-വ്യവസ്ഥയ്ക്ക് 2025-–26 ബജറ്റ് അടിത്തറയിടുന്നു. കേരളത്തിന്റെ സമ്പദ്-വ്യവസ്ഥ നിർണായക സംഭാവന നൽകുന്ന ടൂറിസം മേഖലയ്ക്ക് ഇക്കോ ടൂറിസം, മൈസ് (മീറ്റിംഗുകൾ, പ്രോത്സാഹനങ്ങൾ, കോൺഫറൻസുകൾ, എക്സിബിഷനുകൾ) ടൂറിസം പദ്ധതികളിൽ കേന്ദ്രീകരിച്ചുകൊണ്ട് 385 കോടി രൂപ നീക്കം വച്ചിരിക്കുന്നു.

സാങ്കേതിക മേഖലയിൽ, കണ്ണൂരിലും കൊല്ലത്തും പുതിയ ഐടി പാർക്കുകളും ഇടനാഴികളും വികസിപ്പിക്കുന്നതിന് 517 കോടി രൂപ ബജറ്റിൽ വകയിരുത്തിയിട്ടുണ്ട്. തിരുവനന്തപുരത്ത് ഒരു ജിപിയു ക്ലസ്റ്ററിനായി 10 കോടി രൂപ നീക്കിവെച്ചുകൊണ്ട് എഐ, ബ്ലോക്ക്ചെയിൻ, റോബോട്ടിക്സ് തുടങ്ങിയ വളർന്നുവരുന്ന സാങ്കേതികവിദ്യകൾ സ്വീകരിക്കുന്നതിനുള്ള ബോധപൂർവമായ നീക്കവും കേരളം നടത്തുന്നുണ്ട്. നവീനാശയങ്ങൾ വളർത്തുകയും ചലനാത്മകമായ സാങ്കേതിക ആവാസവ്യവസ്ഥ സൃഷ്ടിക്കുകയും ചെയ്യുന്ന വിജ്ഞാന സമ്പദ്-വ്യവസ്ഥയിൽ സംസ്ഥാനം നായകസ്ഥാനത്ത് നിലകൊള്ളുന്നു.

വ്യാവസായിക വികസനത്തിനായി 1,831 കോടി രൂപ അനുവദിച്ചുകൊണ്ട് ചെറുകിട, ഇടത്തരം സംരംഭങ്ങൾക്കും (എസ്എംഇ) സ്റ്റാർട്ടപ്പുകൾക്കും ബജറ്റ് പിന്തുണ നൽകിയിട്ടുണ്ട്. ഉദാഹരണത്തിന്, കേരളത്തിൽ പ്രതിവർഷം 500 ചെറുകിട സംരംഭങ്ങളെ പരിപോഷിപ്പിക്കുകയും തൊഴിലവസരങ്ങൾ സൃഷ്ടിക്കുകയും നൂതനത്വം ഉത്തേജിപ്പിക്കുകയും ചെയ്യുക എന്നതാണ് മുഖ്യമന്ത്രിയുടെ സംരംഭകത്വ പ്രോത്സാഹന പദ്ധതി ലക്ഷ്യമിടുന്നത്.

കൃഷിയും ഗ്രാമവികസനവും 
സുസ്ഥിരതയോടുള്ള പ്രതിബദ്ധത
കൃഷി ഒരു നിർണായക മേഖലയായി തുടരുന്നു; ഈ സുപ്രധാന വ്യവസായത്തെ ശക്തിപ്പെടുത്തുന്നതിനായി 2025-–26 ലെ ബജറ്റ് 727 കോടി രൂപ അനുവദിച്ചിട്ടുണ്ട്. സമഗ്ര നെൽ കൃഷി വികസന പരിപാടിക്ക് 150 കോടി രൂപയും ഉന്നത മൂല്യമുള്ള ഹോർട്ടികൾച്ചർ കേന്ദ്രമാകാനുള്ള കേരളത്തിന്റെ അഭിലാഷത്തിന് 30 കോടി രൂപയും ലഭിക്കും. മത്സ്യബന്ധന തുറമുഖങ്ങളുടെ നവീകരണത്തിനും കണ്ണൂരിൽ ഒരു ആഗോള ക്ഷീര ഗ്രാമം സൃഷ്ടിക്കുന്നതിനും 295 കോടി രൂപ നീക്കിവച്ചിരിക്കുന്നതിനാൽ മത്സ്യബന്ധന മേഖലയ്ക്കും നേട്ടമുണ്ട്.

മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് (എം ജി എൻആർഇജിഎസ്) ഗണ്യമായ വിഹിതം അനുവദിച്ചുകൊണ്ട് മൊത്തം ഗ്രാമവികസനത്തിന് 7,098 കോടി രൂപ ലഭിച്ചു. ഈ നിക്ഷേപങ്ങൾ, ഗ്രാമീണ സമൂഹങ്ങളുടെ ഉന്നമനത്തിനും സാമ്പത്തിക അവസരങ്ങൾ സംസ്ഥാനത്തിന്റെ എല്ലാ കോണുകളിലും എത്തുന്നുവെന്ന് ഉറപ്പാക്കാനും ലക്ഷ്യമിടുന്നതാണ്.

മൊത്തത്തിൽ നോക്കിയാൽ, 2025–26ലെ കേരള ബജറ്റ് വളർച്ചയും സുസ്ഥിരതയും സമഗ്രതയും ഒന്നിച്ചു സാധ്യമാക്കുന്ന പുരോഗമന ജനപക്ഷ കാഴ്ചപ്പാട് പ്രതിഫലിപ്പിക്കുന്നതാണ്. സാമ്പത്തികമായ വെല്ലുവിളികളും മറ്റും നേരിടുന്ന ഘട്ടത്തിലും, കേരളത്തിലെ എൽഡിഎഫ് ഗവൺമെന്റ് പുരോഗമനാത്മകമായ വികസനത്തിന്റെ പാതയിലൂടെ മുന്നേറുകയാണെന്ന് ഉറപ്പാക്കുന്ന ബജറ്റാണ് ഇത്. l