പൊതുമേഖലാ ബാങ്കുകളുടെ കോർപ്പറേറ്റ്-വത്കരണവും പ്രത്യാഘാതങ്ങളും

സ്വാതന്ത്ര്യത്തിന് മുൻപ് ബ്രിട്ടീഷ് സർക്കാരിന്റെ കേന്ദ്ര ബാങ്കായി പ്രവർത്തിച്ചുകൊണ്ടിരുന്ന ഇംപീരിയൽ ബാങ്ക് ഓഫ് ഇന്ത്യയെ 1955 ലാണ് സ്റ്റേറ്റ് ബാങ്ക് ഓഫ് ഇന്ത്യ എന്ന പേരിൽ സർക്കാർ ദേശസാൽക്കരിക്കുന്നത്. 1960 ൽ പല സംസ്ഥാനങ്ങളിൽ പ്രവർത്തിച്ചിരുന്ന  ചെറു ബാങ്കുകളെ സംയോജിപ്പിച്ചും അല്ലാതെയും ഏഴ് ബാങ്കുകളെ സ്റ്റേറ്റ് ബാങ്കിന്റെ സബ്സിഡയറി ബാങ്കുകളായി രൂപീകരിച്ചു. 1969 ൽ 14 സ്വകാര്യ ബാങ്കുകളെ അന്നത്തെ യൂണിയൻ സർക്കാർ ദേശസാൽക്കരിച്ചു. തുടർന്ന് 1980 ൽ 6 ബാങ്കുകൾ കൂടി ദേശസാൽക്കരിക്കപ്പെട്ടു. 1969 ലെ മെഗാ ദേശസാൽക്കരണത്തിനു മുൻപ്, ടാറ്റ, ബിർല, ഗോയങ്കമാരെപ്പോലെയുള്ള അന്നത്തെ വലിയ കുത്തക മുതലാളിമാരുടെ കൈവശമായിരുന്നു ഇന്ത്യൻ ബാങ്കുകൾ. നിക്ഷേപമായി ലഭിക്കുന്ന പണം അവരുടെ താത്പര്യത്തിന് വേണ്ടിയായിരുന്നു ഉപയോഗിച്ചിരുന്നത്.

രാജ്യത്തെ ഇടത് ട്രേഡ് യൂണിയനുകളുടെ, വിശിഷ്യ, ബാങ്കിംഗ് മേഖലയിലെ ട്രേഡ് യൂണിയനുകളുടെ ശക്തമായ ഇടപെടലുകളാണ് ദേശസാൽക്കരണ നടപടിക്ക് കാരണമായത്. അതോടൊപ്പം ഇന്ത്യൻ നാഷണൽ കോൺഗ്രസിനുള്ളിലെ പടലപ്പിണക്കങ്ങൾ ബാങ്ക് ദേശസാൽക്കരണ തീരുമാനത്തിന്റെ വേഗത കൂട്ടി. സാധാരണക്കാരിലേക്ക് ബാങ്കിംഗ് സൗകര്യം എത്തുന്നതിന് ദേശസാൽകൃത ബാങ്കുകൾ ഒരു വലിയ പങ്കാണ് വഹിച്ചത്. 1969 ജൂലായ് 19 ന് അന്നത്തെ പ്രധാനമന്ത്രി ഇന്ദിര ഗാന്ധി രാജ്യത്തോട് പറഞ്ഞത് ഇതുവരെ ഒരു പരിധിവരെ അവഗണിക്കപ്പെട്ട മുൻഗണനാ മേഖലകളിലേക്ക് ബാങ്ക് വായ്പ വ്യാപിപ്പിക്കുന്നതിനുവേണ്ടിയാണ് ബാങ്കുകളെ ദേശസാൽക്കരിക്കുന്നത് എന്നാണ്.

ബാങ്കുകൾ, അവരുടെ ആകെ വായ്പയുടെ 40 ശതമാനം മുൻഗണനാ വിഭാഗങ്ങൾക്ക് (Priority Sector), അതിൽ 18 ശതമാനം കാർഷിക മേഖലക്ക്, നൽകണമെന്നതായിരുന്നു റിസർവ്വ് ബാങ്കിന്റെ നിർദ്ദേശം. ഇത് ദേശസാൽക്കരണത്തിന്റെ പ്രഖ്യാപിത ലക്ഷ്യങ്ങൾ വലിയ ഒരു പരിധിവരെ സാക്ഷാത്കരിക്കുന്നതിന് കാരണമാവുകയും ചെയ്തു. അന്നുവരെ വട്ടിപ്പലിശക്കാരെ ആശ്രയിച്ച് കഴിഞ്ഞ ചെറുകിട – ഇടത്തരം കർഷകർക്ക് കുറഞ്ഞ പലിശയ്ക്ക് വായ്പകൾ ലഭിച്ചതോടെ കാർഷിക മേഖല വികസിച്ചു, ഹരിതവിപ്ലവം സാധ്യമായി. അതോടൊപ്പം അന്നത്തെ വൻ വ്യവസായ ഗ്രൂപ്പായ ടാറ്റ മുതൽ ഇന്നത്തെ വൻ കുത്തകയായ അംബാനിവരെയുള്ള ഇന്ത്യൻ കുത്തകകളുടെ വളർച്ചയ്-ക്കും ബാങ്കുകൾ വലിയ സംഭാവനയാണ് നൽകിയത്.

നയങ്ങൾ പൂർണമായും വഴിമാറിയപ്പോൾ
ബാങ്ക് ദേശസാൽക്കരണത്തിനുശേഷം 1991 വരെ രാജ്യത്തെ ബാങ്കിംഗ് മേഖലയിൽ വലിയ ഒരു കുതിച്ചു ചാട്ടമാണ് ഉണ്ടായത്. ഈ കാലയളവിൽ ആകെ ബാങ്ക് ബിസിനസ്സിന്റെ 90 ശതമാനവും പൊതുമേഖലാ ബാങ്കുകളിലായിരുന്നുവെങ്കിൽ ഇപ്പോൾ അത് 57.5 ശതമാനമായി ചുരുങ്ങി. അന്ന്  പൊതുമേഖലാ ബാങ്കുകളുടെ അതേ നയങ്ങൾ തന്നെയായിരുന്നു സ്വകാര്യ മേഖലാ ബാങ്കുകളും തുടർന്നിരുന്നത്. കാർഷിക വായ്പകളുൾപ്പടെ മുൻഗണനാ വായ്പകൾ സ്വകാര്യ ബാങ്കുകളും റിസർവ്വ് ബാങ്ക് മാർഗ്ഗ നിർദ്ദേശപ്രകാരം നൽകി വന്നിരുന്നു. എന്നാൽ 1991 ൽ സാമ്രാജ്യത്വ ആഗോളവത്കരണ നയങ്ങൾക്ക് ഔദ്യോഗികമായി തുടക്കം കുറിച്ചതുമുതൽ ബാങ്കിംഗ് മേഖലയിലും വലിയ മാറ്റങ്ങൾ വന്നു. 1991 ലെ ഒന്നാം നരസിംഹം കമ്മിറ്റി റിപ്പോർട്ടും 1998 ലെ രണ്ടാം നരസിംഹം കമ്മിറ്റി റിപ്പോർട്ടുമാണ് ഇന്ത്യയിലെ ധന മേഖലാ പരിഷ്കാരങ്ങൾക്ക് തുടക്കം കുറിച്ചതും ദിശ തീരുമാനിച്ചതും. അതിനു ശേഷം പല ഘട്ടങ്ങളിലായി അനേകം കമ്മിറ്റികളാണ് ധനമേഖലാ പരിഷ്കരണത്തിനായി നിയോഗിച്ചത്.ഏറ്റവും ഒടുവിൽ ധനമന്ത്രി നിർമല സീതാരാമൻ അവതരിപ്പിച്ച ബജറ്റിലും ബാങ്കിംഗ് പരിഷ്കാരങ്ങൾക്കായി ഒരു പുതിയ കമ്മിറ്റി രൂപീകരിക്കുന്നതായുള്ള സൂചനയുമുണ്ട്. പൊതുമേഖലാ ബാങ്കുകളുടെ ജനകീയ ബാങ്കിംഗ് പ്രവർത്തന രീതിക്ക് മാറ്റം വരുത്തുന്ന നയങ്ങൾ സർക്കാർ അതിവേഗം നടപ്പിലാക്കുകയാണ് ഇപ്പോൾ. നവ സ്വകാര്യ ബാങ്കുകളുടെ കഴുത്തറപ്പൻ പലിശയും സേവന നിരക്കുകളും പൊതുമേഖലാ ബാങ്കുകളിലും അടിച്ചേൽപ്പിക്കപ്പെട്ടു. ഇന്ത്യൻ എയർലൈൻസിനെയും എയർ ഇന്ത്യയെയും ലയിപ്പിച്ചതിനുശേഷം ടാറ്റയ്-ക്ക് കൈമാറിയതുപോലെ പൊതുമേഖലാ ബാങ്കുകളുടെ എണ്ണവും വണ്ണവും കുറച്ച് വിൽപ്പന നടത്തുക, വൻകിട കുത്തകകൾക്ക് കൈമാറുക എന്ന നയമാണ് ഭരണാധികാരികൾ നടപ്പിലാക്കാൻ ശ്രമിക്കുന്നത്.

വൻകിട കുത്തക മുതലാളിമാർ എടുത്ത ബാങ്ക് വായ്പകളും അവരുടെ കിട്ടാക്കടങ്ങൾ എഴുതിത്തള്ളലുകളുമെല്ലാം പലകുറി ചർച്ച ചെയ്യപ്പെട്ടിട്ടുള്ളതാണ്. റിസർവ്വ് ബാങ്ക് തന്നെ പുറത്തുവിട്ട കണക്കു പ്രകാരം നരേന്ദ്ര മോദി അധികാരമേറ്റ 2014 ന് ശേഷം 2023 മാർച്ച് 31 വരെയുള്ള വർഷം എഴുതിത്തള്ളിയ ബാങ്ക് വായ്പ 14,56,226 കോടി രൂപയാണ്. ഇതിൽ എൺപത് ശതമാനത്തിലേറെയും അഞ്ചുകോടി രൂപക്ക് മുകളിലാണ്. വിവരാവകാശ നിയമപ്രകാരം ലഭിച്ച കണക്കുകൾ പ്രകാരം ഇങ്ങനെ എഴുതിത്തള്ളിയ വായ്പകളിൽ വലിയ കുത്തക കമ്പനികളുടേത് മാത്രം 7,40,968 കോടി രൂപയാണ്. അതായത് ആകെ എഴുതിത്തള്ളിയതിന്റെ 51% വും വൻകിട കുത്തക മുതലാളിമാരുടെ കമ്പനികളുടേതാണ്. നിർമല സീതാരാമൻ ധനകാര്യ മന്ത്രിയായ 2019 ന് ശേഷം എഴുതിത്തള്ളിയ വായ്പകളുടെ കണക്ക് താഴെപ്പറയും പ്രകാരമാണ്.

2019-–20 – 2,34,170 കോടി രൂപ
2020-–21 – 2,02,781 കോടി രൂപ
2021 –-22 – 1,74,966 കോടി രൂപ
2022 -–23 – 2,09,144 കോടി രൂപ

എഴുതിത്തള്ളലിൽ നിന്നും ‘മുടി വെട്ടിലേക്ക്.’
ഇതൊക്കെ ബാങ്കുകൾ, എഴുതിത്തള്ളിയ (Write off) വായ്പകളാണ്. അഥവാ ഇത്തരം എഴുതിത്തള്ളലുകളിൽ വളരെ വളരെ ചെറിയ ശതമാനം സാധാരണക്കാരനും ലഭ്യമാകാം. എന്നാൽ 2016 മെയ് മാസം 28 ന് രാഷ്ട്രപതിയുടെ അംഗീകാരത്തോടെ വൻകിടക്കാർക്ക് മാത്രമായ ഒരു ഒഴിവാക്കൽ പദ്ധതി ആരംഭിച്ചിരുന്നു. ഐ.ബി.സി. എന്ന ചുരുക്കപ്പേരിൽ അറിയപ്പെടുന്ന ഇൻസോൾവൻസി ആൻഡ് ബാങ്കറപ്റ്റ്സി കോഡ് എന്നതാണ് പ്രസ്തുത നിയമം. ഇതുപ്രകാരം ഒഴിവാക്കുന്ന വായ്പ എഴുതിത്തള്ളൽ എന്നല്ല അറിയപ്പെടുക. അതിന് ഹെയർ കട്ട് അഥവാ മുടിവെട്ട് എന്നാണ് പുതിയ പേര്. സ്മോൾ ഹെയർകട്ട് മുതൽ ഡീപ് ഹെയർ കട്ട് വരെയുണ്ട് ഈ മുടി വെട്ടൽ പ്രക്രിയയിൽ. മോദിയുടെ കാലത്ത് നടത്തിയ ചില സുവർണ മുടി വെട്ടലുകളിലൂടെ നടന്ന വൻകിട കൊള്ളയുടെ ഒരു ചെറിയ ചിത്രം.

ഇങ്ങനെയുള്ള 21 ലക്ഷം കോടിയുടെ വൻകിട വായ്പകളാണ് ‘ഹെയർ കട്ട്’ നടത്തുന്നതിനായി മാറ്റിവെക്കപ്പെട്ടിരിക്കുന്നതെന്ന് ഓർക്കുക. ഇതൊന്നും എഴുതിത്തള്ളലുകളല്ല, ഇതെല്ലാം വെറും ‘ഹെയർ കട്ടുകൾ ‘ മാത്രം. ഏറ്റെടുത്ത കമ്പനികളുടെയും വായ്പ എടുത്ത കമ്പനികളുടെയും ഉടമസ്ഥരെ സംബന്ധിച്ച് പരിശോധിച്ചാൽ പലതും ബന്ധുക്കളുടെ കമ്പനികളുടേതാണ് എന്ന് മനസ്സിലാക്കാനാകും. ഏറ്റവും ഒടുവിൽ നടന്ന, ജ്യേഷ്ഠാനുജൻമാരായ അംബാനി മുതലാളിമാരുടെ ഒരു വൻ മുടിവെട്ട് കൂടി പരിശോധിച്ചാൽ മോദി സർക്കാരിന്റെ യഥാർത്ഥ ചങ്ങാത്തം ആരോട് എന്നതിന്റെയും ഒരു കൃത്യമായ ചിത്രം വ്യക്തമാകും.

അനുജന്റെ ‘മുടി വെട്ടാൻ’ ജ്യേഷ്ഠൻ
2023 ഡിസംബർ 21 നാണ് അനിൽ അംബാനിയുടെ റിലയൻസ് ഇൻഫ്രാടെൽ കമ്പനിയെ അദ്ദേഹത്തിന്റെ ജ്യേഷ്ഠൻ മുകേഷ് അംബാനിയുടെ റിലയൻസ് ജിയോ ഏറ്റെടുത്ത പ്രക്രിയക്ക് നാഷണൽ കമ്പനി ലോ ട്രിബ്യൂണലിന്റെ അന്തിമ അനുമതി ലഭിച്ചത്. 2004 ൽ സ്ഥാപിതമായ റിലയൻസ് ഇൻഫ്രാടെല്ലും അവരുടെ മൊബൈൽ കമ്പനിയും അന്ന് നാട്ടുകാർക്കിടയിൽ ഒരു വലിയ  ഹരമായിരുന്നു. അനിൽ അംബാനി നൽകുന്ന മൊബൈൽ സേവനങ്ങളെ സംബന്ധിച്ച് നമ്മുടെ മാധ്യമങ്ങളിൽ ദിവസവും പുതിയ പുതിയ നിറം പിടിപ്പിച്ച കഥകൾ നിറഞ്ഞു. ബി.എസ്.എൻ.എൽ എന്ന പൊതുമേഖലാ സ്ഥാപനത്തെ ഇകഴ്ത്താനും റിലയൻസ് മൊബൈലിനെ പുകഴ്ത്താനും പല മാധ്യമങ്ങളുടെയും ഒരുപാട് പേജുകൾ മാറ്റി വെക്കപ്പെട്ടു. പൊതുമുതൽ ധൂർത്ത് നടത്തുന്ന ബി.എസ്.എൻ.എൽ എന്തിന് ഇത്തരത്തിൽ തുടരണം എന്നത് പോലും ചർച്ച ചെയ്യപ്പെട്ടു. എന്നാൽ അനിയൻ അംബാനി എങ്ങനെയാണ് ഈ മൊബൈൽ സാമ്രാജ്യം പടുത്തുയർത്തിയത് എന്നത് ആരും അറിഞ്ഞില്ല, അഥവാ അറിയിച്ചില്ല. ഇന്നും അതിനെക്കുറിച്ച് ഒരു ചർച്ചയും സംഘടിപ്പിക്കാൻ നമ്മുടെ മുഖ്യധാരാ മാധ്യമങ്ങൾ തയ്യാറാകുന്നതുമില്ല.

അപസർപ്പക നോവലിനെ വെല്ലുന്ന അനുജൻ അംബാനിയുടെ തട്ടിപ്പ് കഥ
റിലയൻസ് ഇൻഫ്രാടെൽ പണം സ്വരൂപിച്ചതും ആസ്തികൾ വാരിക്കൂട്ടിയതും പിന്നീട് പ്രവർത്തനം മരവിപ്പിച്ചതുമെല്ലാം ഒരു അപസർപ്പക നോവലിനെ വെല്ലുന്ന രീതിയിലായിരുന്നു. ദേശീയ ബാങ്കുകളിൽ നിന്ന് മാത്രമല്ല, അന്തർദേശീയ ധന സ്ഥാപനങ്ങളിൽ നിന്നു പോലും അനിൽ അംബാനിയുടെ റിലയൻസ് വായ്പകൾ വാരിക്കൂട്ടി. രാജ്യത്തെ ഭരണാധികാരികളിലുള്ള അനിലിന്റെ സ്വാധീനം അത്രമാത്രം വലുതായിരുന്നു. ഏറ്റവും കൂടുതൽ വായ്പ നൽകിയത് പതിവുപോലെ സ്റ്റേറ്റ് ബാങ്ക് ഓഫ് ഇന്ത്യയായിരുന്നു. 3628.68 കോടി രൂപ. 1832.91 കോടി ഇന്ത്യൻ രൂപയ്-ക്ക് സമാനമായി വായ്‌പ നൽകിയ ഇൻഡസ്ട്രിയൽ ആൻഡ്- കമേഴ്സ്യൽ ബാങ്ക് ഓഫ് ചൈനയാണ് രണ്ടാം സ്ഥാനത്ത്. സിൻഡിക്കേറ്റ് ബാങ്ക് (ഇപ്പോൾ കനറാ ബാങ്ക്), ബാങ്ക് ഓഫ് ഇന്ത്യ, യൂണിയൻ ബാങ്ക് ഓഫ് ഇന്ത്യ, ഇന്ത്യൻ ഓവർസീസ് ബാങ്ക്, ശുഭ്ഹോൾഡിംഗ്, എസ് സി ലോവി അസറ്റ് മാനേജ്മെന്റ്, ദോഹ ബാങ്ക്, സ്റ്റാൻഡേർഡ് ചാർട്ടേർഡ് ബാങ്ക്, എമിറേറ്റ്സ് ബാങ്ക്, ചൈന ഡെവലപ്മെന്റ് ബാങ്ക്, എക്സ്പോർട്ട് ആൻഡ് ഇംപോർട്ട് ബാങ്ക് ഓഫ് ചൈന…… ഇന്ത്യയിലെയും വിദേശത്തെയും ധനകാര്യ സ്ഥാപനങ്ങളുടെ പട്ടിക നീളുകയാണ്. ഇപ്പറഞ്ഞ സ്ഥാപനങ്ങളെയെല്ലാം വിഡ്ഢികളാക്കിയ അനിൽ അംബാനിയെന്ന കുത്തക ഭീമൻ നമ്മുടെ രാജ്യത്തെ ബാങ്കുകളിൽ നിന്നു മാത്രം കൈവശപ്പെടുത്തിയ സാധാരണക്കാരുടെ നിക്ഷേപ പണം 47,251 കോടി രൂപയാണ്. ഈ തുകയാണ് 2020 ൽ ബാങ്കുകൾ കിട്ടാക്കടമായി പ്രഖ്യാപിച്ചത്. മാത്രമല്ല അംബാനിയുടെ വഴിവിട്ട ഇടപാടുകൾ കണ്ടെത്തി സ്റ്റേറ്റ് ബാങ്ക് ഓഫ് ഇന്ത്യ 2020 നവംബർ 10 ന് അവരുടെ റെക്കോർഡുകളിൽ കമ്പനിയെ തട്ടിപ്പ് കമ്പനി അക്കൗണ്ട് (Fraud Account) എന്ന തരത്തിലേക്ക് മാറ്റുകയും ചെയ്തു.

വായ്പ ദുരുപയോഗം, ക്രിമിനൽ വിശ്വാസ ലംഘനം, വ്യാജ ഉപകരണങ്ങൾ വഴിയുള്ള തട്ടിപ്പ്, പുസ്തകങ്ങളിലും അക്കൗണ്ടുകളിലും വരുത്തുന്ന തട്ടിപ്പ്, അനധികൃത ക്രെഡിറ്റ് സൗകര്യങ്ങൾ, പണക്ഷാമം, വ്യാജരേഖ നിർമിക്കൽ, വിദേശനാണ്യം ഉൾപ്പെടുന്ന വഞ്ചനാപരമായ ഇടപാടുകൾ എന്നിവയാണ് ഒരു വായ്പയെ തട്ടിപ്പ് വായ്പയായി മാറ്റുന്നതിനുവേണ്ടി റിസർവ്വ് ബാങ്ക് പുറപ്പെടുവിച്ചിരിക്കുന്ന മാനദണ്ഡങ്ങൾ. അന്ന് നിലവിലുണ്ടായിരുന്ന റിസർവ്വ് ബാങ്ക് നിയമപ്രകാരം, തട്ടിപ്പ് അക്കൗണ്ടുകൾ എഴുതിത്തള്ളാനോ ഐ.ബി.സി. നിയമ പ്രകാരം മുടിവെട്ട് (Hair Cut) നടത്താനോ അനുവാദമില്ല.എന്നാൽ 2020 നവംബർ 10 ന് എസ്.ബി.ഐ. ഉൾപ്പടെയുള്ള സർക്കാർ ബാങ്കുകൾ കണ്ടെത്തിയ അനിൽ അംബാനിയുടെ റിലയൻസ് ഇൻഫ്രാടെല്ലിന്റെ തട്ടിപ്പ് അക്കൗണ്ട് എന്ന ടാഗ്, കേവലം 24 ദിവസങ്ങൾ കഴിഞ്ഞപ്പോൾ, 2020 ഡിസംബർ 5 ന്, അതേ സർക്കാർ ബാങ്കുകൾ തന്നെ പൊടുന്നനെ  നീക്കം ചെയ്യുന്നു. ഒരു അക്കൗണ്ട് തട്ടിപ്പായി പ്രഖ്യാപിക്കപ്പെട്ടാൽ അതുടൻ തന്നെ ‘ക്രിലിക്’ [Central Repository of Information on Large Credits (CRILC)] നെ അറിയിക്കണം എന്ന ചട്ടവും പാലിക്കപ്പെട്ടില്ല. തട്ടിപ്പ് പട്ടം ഒഴിവാക്കിയതോടെ വായ്പ ഐ.ബി.സി.പ്രകാരം ലേലം ചെയ്യപ്പെടുന്നു. ലേലത്തിലൂടെ പിടിച്ചെടുക്കാൻ അനിൽ അംബാനിയുടെ ജ്യേഷ്ഠൻ മുകേഷ് അംബാനിയുടെ ജിയോ ഇൻഫ്രാസ്ട്രക്ചർ എത്തുന്നു. 47,251 കോടിയുടെ കിട്ടാക്കടമുള്ള സ്ഥാപനത്തെ കേവലം 455.9 കോടിക്ക് ജിയോ ഏറ്റെടുക്കാൻ തയ്യാറാകുന്നു. ഇത്രയും പ്രക്രിയ കഴിഞ്ഞപ്പോൾ 2021 ജനുവരി 6 ന്, ജനങ്ങളുടെ കണ്ണിൽ പൊടിയിടാനെന്നോണം എസ്.ബി.ഐ  ഒരു പരാതി കേന്ദ്ര സർക്കാർ ഏജൻസിയായ സി.ബി.ഐ.ക്ക് നൽകി! ഇതിനെതിരെ അനിൽ അംബാനി ഹൈക്കോടതിയെ സമീപിച്ചു. ഉടനെ ഹൈക്കോടതി വക എസ്.ബി.ഐ.യുടെ നടപടിക്ക് സ്റ്റേ. ഹൈക്കോടതി തുടർന്ന് ഈ കേസിൽ അനിൽ അംബാനിക്ക് അനുകൂലമായി വിധിയും പ്രഖ്യാപിച്ചു. മാത്രമല്ല തട്ടിപ്പ് അക്കൗണ്ട് പട്ടം മാറ്റിയത് ചൂണ്ടിക്കാണിച്ച് എസ്.ബി.ഐ.യോട് ഒരു സമ്മതപത്രം കോടതിയിൽ നൽകാനും ആവശ്യപ്പെട്ടു. വിഷയത്തിൽ സെബിയും (SEBl) ഇടപെട്ടു. ജ്യേഷ്ഠനോടും അനുജനോടും, ഇത്തരം അനധികൃത ഇടപെടലുകളിലേർപ്പെട്ടതിന് 25 കോടി രൂപ പിഴയിനത്തിൽ നൽകാനാണ് അവർ ഉത്തരവിട്ടത്.

റിസർവ്വ് ബാങ്കിനും കൂറ് മുതലാളിമാരോട്
മേൽപ്പറഞ്ഞ ഭരണ കുത്തക നിയമ സംവിധാനങ്ങളുടെ ഇണപിരിയാത്ത ചങ്ങാത്ത സംവിധാനങ്ങളുടെ ചെയ്തികൾക്കാണ് 2023 ഡിസംബർ 21 ന് നാഷണൽ കമ്പനി ലോ ട്രിബ്യൂണൽ അന്തിമ അനുമതി നൽകിയത്. നമ്മുടെ പൊതു പണം ബാങ്കുകളിൽ നിന്ന് തട്ടിയെടുത്ത്  അനിൽ അംബാനിയുടെ റിലയൻസ് കമ്പനി നേടിയ സമ്പത്ത് അതിഭീമമാണ്. രാജ്യത്താകെ കമ്പനിക്ക് 43,500 ടവറുകൾ സ്വന്തമായുണ്ട്. 1,70,000 കിലോമീറ്റർ ഒപ്ടിക് ഫൈബർ കേബിൾ രാജ്യത്താകെ ഭൂമിക്കടിയിലൂടെ സ്ഥാപിച്ചിട്ടുമുണ്ട്. നോക്കുക, ബി.എസ്.എൻ.എല്ലിന്റെ കണക്കുപ്രകാരം ഒരു ടവർ സ്ഥാപിക്കാൻ കുറഞ്ഞത് 25 ലക്ഷം രൂപയും  ഒരു കിലോമീറ്റർ ഒപ്ടിക് ഫൈബർ കേബിൾ നിക്ഷേപിക്കാൻ ഭൂപ്രകൃതിയുടെ കിടപ്പ് പ്രകാരം 6000 മുതൽ 1 കോടി രൂപ വരെയുമാണ് ചെലവ് കണക്കാക്കപ്പെടുന്നത്. അനിൽ അംബാനിയുടെ കേവലം ഈ രണ്ട് സമ്പത്തുകൾ മാത്രം ലേലം ചെയ്ത് വിൽപ്പന നടത്തിയിരുന്നുവെങ്കിൽ ബാങ്കുകൾക്ക് എത്ര പണം ലഭിക്കുമായിരുന്നു എന്ന് ചിന്തിക്കുക. ഈ ലക്ഷം കോടി രൂപയുടെ സമ്പത്തുൾപ്പടെയുള്ള സ്ഥാപനത്തെയാണ് തുച്ഛമായ തുകയ്-ക്ക്, ഏറ്റെടുക്കൽ പ്രക്രിയയിലൂടെ മുകേഷ് അംബാനി സ്വന്തമാക്കിയത്. 47,251 കോടിയുടെ കിട്ടാക്കടം കേവലം 455.9 കോടിക്കാണ് കൈമാറിയതിലൂടെ ബാങ്കുകൾക്ക് ലഭിച്ചത് ആകെ കിട്ടാക്കടത്തിന്റെ കേവലം 0.96% പണം മാത്രം. 99% എഴുതിത്തള്ളൽ; അല്ല മുടിവെട്ട് ! ഈ മുടിവെട്ട് നൽകിയ അനിൽ അംബാനിക്കാണ് കുറച്ച് വർഷങ്ങൾക്കുമുൻപ് റഫേൽ യുദ്ധവിമാനമുണ്ടാക്കുന്നതിനായി 55,000 കോടി രൂപയുടെ കരാർ  ദേശസ്നേഹ സർക്കാർ വെള്ളിത്തളികയിൽ ഏൽപ്പിച്ച് നൽകിയത് എന്നതും മറക്കരുത്. മാത്രമല്ല കഴിഞ്ഞ 2023 ജൂൺ 8 ന് റിസർവ്വ് ബാങ്ക് ഒരു ഉത്തരവിറക്കി. ഇനി മുതൽ തട്ടിപ്പ് അക്കൗണ്ടുടമകൾക്കും മനപ്പൂർവ്വം കിട്ടാക്കടം വരുത്തിയവർക്കും വീണ്ടും ബാങ്കുകൾക്ക് നിയമപ്രകാരം തന്നെ വായ്പകൾ നൽകാമെന്ന്! ഇനി ഇത്തരം കുറ്റാന്വേഷണ കഥകളെ വെല്ലുന്ന തിരക്കഥ നിർമിക്കാൻ ബദ്ധപ്പെടേണ്ടതില്ല എന്നു ചുരുക്കം.

‘പ്രത്യേക ലാളന’യോടെ രാജ്യ സമ്പത്ത് അദാനിക്ക്.

ഇനി മറ്റൊരു കുത്തക ഗൗതം അദാനിയോടുള്ള സർക്കാരിന്റെ സമീപനം പരിശോധിക്കാം. 2024 ആഗസ്റ്റ് 30 ന് 11.6 ലക്ഷം കോടി രൂപയുടെ ആസ്തിയുമായി ഗൗതം അദാനി, ഇന്ത്യയിലെ ഏറ്റവും വലിയ പണക്കാരനായി മാറിയിരിക്കുകയാണ്. ലക്ഷം കോടികളുടെ ഞെട്ടിക്കുന്ന അഴിമതിക്കഥകൾ പുറത്തുവന്നിട്ടും ഗൗതം അദാനിക്ക് ഇപ്പോഴും ‘പ്രത്യേക ലാളന’യാണ് ലഭിച്ചുകൊണ്ടിരിക്കുന്നത്. കേവലം ഭരണകൂടത്തിന്റെ മാത്രമുള്ള ലാളനയല്ല, ജനാധിപത്യത്തിന്റെ നാലാംതൂണ് എന്ന് വിശേഷിപ്പിക്കുന്ന മാധ്യമങ്ങൾ പോലും അദാനിയുടെ അഴിമതിക്കഥകൾ വാർത്തയാക്കുന്നതേയില്ല. അഥവാ മാധ്യമങ്ങൾ മാധ്യമ കുത്തകകളായി എന്നു ചുരുക്കം. രാജ്യത്തെ ബാങ്കിംഗ് മേഖലയെ അദാനിക്കുവേണ്ടി വിടുപണി ചെയ്യിക്കുകയാണ് യൂണിയൻ സർക്കാർ. ഇൻസോൾവെൻസി ആൻഡ് ബാങ്കറപ്റ്റ്സി കോഡ് (IBC) നിയമപ്രകാരം നൽകിയ ലക്ഷം കോടികളുടെ ‘മുടിവെട്ട്,’ അദാനി കമ്പനികളെയും വളരെയേറെ സഹായിച്ചിട്ടുണ്ട്. പത്തു കുത്തക കമ്പനികൾ രാജ്യത്തെ പൊതുമേഖലാ ബാങ്കുകൾക്ക് നൽകാനുണ്ടായിരുന്ന കടം 61,832 കോടി രൂപ. അത് കേവലം 15,977 കോടി രൂപയ്-ക്ക് അദാനിയുടെ കമ്പനികൾക്ക് കൈമാറി. ഈ പണം ബാങ്കുകൾ അദാനിക്ക് വായ്പയായി നൽകുകയും ചെയ്യും. ബാങ്കുകളുടെ നഷ്ടം 45,855 കോടി രൂപയാണ്. ഇത് മുതലാക്കാൻ ബാങ്കുകൾ വൻകിട കുത്തകകൾക്കു വേണ്ടി ഇടപാടുകാരെ സർവ്വീസ് ചാർജിനത്തിൽ പിഴിയും.

‘ഹെയർ കട്ട്’ നിയമപ്രകാരം ചുളുവിലയ്-ക്ക് അദാനിക്ക് രാജ്യത്തെ പൊതുമേഖലാ ബാങ്കുകൾ നൽകിയ പത്ത് കമ്പനികളുടെ പട്ടിക ചുവടെ:

നവംബർ 26: തൊഴിലാളികളും കർഷകരും യുവജനങ്ങളും ഒന്നിക്കുന്നു.
റിസർവ്വ് ബാങ്കിന്റെ രണ്ടാം ഷെഡ്യുളിൽ 137 വാണിജ്യ ബാങ്കുകളാണ് നിലവിലുള്ളത്.

പൊതുമേഖലാ ബാങ്കുകൾ – 12
സ്വകാര്യ മേഖലാ ബാങ്കുകൾ – 22
സ്മോൾ ഫിനാൻസ് ബാങ്കുകൾ – 11
പെയ്മെന്റ് ബാങ്കുകൾ – 3
റീജണൽ റൂറൽ ബാങ്കുകൾ – 43
വിദേശ ബാങ്കുകൾ – 46
എന്നിങ്ങനെയാണ് അവ.

ഇന്ന് വാണിജ്യ ബാങ്കുകളിലെ ആകെ നിക്ഷേപം 237 ലക്ഷം കോടി രൂപയും വായ്പ 171 ലക്ഷം കോടി രൂപയുമാണ്. നിക്ഷേപങ്ങളിൽ 85 ശതമാനവും സാധാരണക്കാരുടേതും ഇടത്തരക്കാരുടേതുമാകുമ്പോൾ വായ്പയിൽ സിംഹഭാഗവും നൽകിയിരിക്കുന്നത് വൻകിട മുതലാളിമാർക്കാണ്. അവരുടെ വായ്പകളാണ് എഴുതിത്തള്ളുന്നതും ഹെയർകട്ടിലൂടെ ഒഴിവാക്കപ്പെടുന്നതും. ഇന്ത്യൻ ബാങ്കിംഗ് മേഖലയുടെ സമ്പത്ത് കുത്തിച്ചോർത്തുകയാണ് കുത്തക മുതലാളിമാർ. യൂണിയൻ സർക്കാരിന്റെ ഈ ശിങ്കിടിമുതലാളിത്ത നയങ്ങളെ (ക്രോണി കാപ്പിറ്റലിസം) നാം ചെറുത്തു തോല്പിക്കണം. അതിനു നേതൃത്വം കൊടുക്കേണ്ടത് തൊഴിലാളി വർഗമാണ്. 2024 നവംബർ 26 ന് കേന്ദ്ര ട്രേഡ് യൂണിയനുകളും സംയുക്ത കിസാൻ മോർച്ചയും ആഹ്വാനം ചെയ്തിരിക്കുന്ന പ്രതിഷേധ പരിപാടിയിൽ യുവജനങ്ങളും കർഷകത്തൊഴിലാളികളും അണിചേരുകയാണ്. സർക്കാരിന്റെ ചങ്ങാത്ത മുതലാളിത്ത നയങ്ങൾക്കെതിരെയാണ് ഈ പോരാട്ടം. അത് വിജയിപ്പിക്കുന്നതിന് എല്ലാ വിഭാഗം ജനങ്ങളും മുന്നിട്ടിറങ്ങേണ്ടതുണ്ട്. l